شركات الشحن والتسوق عبر الانترنت

التسوق من الانترنت 

انتشرت عمليات التسوق من الانترنت من بشكل سريع في السنوات القليلة الماضية وبصراح انا كنت واحد من اللي مجنونين بالتسوق من المواقع بس طبعاً المواقع الكبيرة والمضمونة زي امازون والايباي وولمارت بس كانت فيه مشكلة كبيرة بلاقيها ان معظم المواقع دي بتشحن فقط داخل امريكا ودا خلاني هتجنن لان فيه حاجات كتير حلوة ورخيصة على المواقع دي فبدأت ادور ازاي اشتري منهم واخلي البضاعة دي او الشحنات دي توصلني بأقل التكاليف وطبعا كنت بحسب سعر البضاعة اللي بشتريها وبضيف عليها التكاليف اللي ممكن تقابلني زي اسعار الشحن والجمارك

فدورت لقيت انه لازم يكون عندك عنوان امريكي بأسمك عشان المواقع دي تبعتلك عليه الشحنات

طب أجيب عنوان امريكي ازاي المهم دورت اكتر لقيت ان فيه شركات شحن بتقدملك عنوان بأسمك تقدر تستقبل عليه جميع الشحنات اللي ممكن تشتريها من المواقع دي والعنوان بيكون مدى الحياة وبعض الشركات دي بتديك العنوان مجانا وبعضهم بفلوس لكن رمزية الصراحة وانت من خلال الشركة اللي هتستقر انك تخلي عنوانك فيها تقدر تحدد نوع اشتراكك ايه على حسب متطلباتك يعني لو شحناتك قليلة زي انا مثلا اخترت تسجيل مجاني لاني كل كام شهر بعمل شحنة 

فبدأت اشوف واقارن بين كل الشركات واكتب فورقة اسم الشركة وخدماتها وجمب كل خدمة بكتب سعرها او هل هي مجانية

زي خدمة التجميع ( تجميع الشحنات وارسالها في شحنة واحدة علشان الجمارك ) وزي خدمة التغليف وزي خدمة تصوير الشحنة وخدمات تاني كتير لقيت ان افضلهم شوية في الاسعار والسمعة شركة Myus فتوكلت على الله وقولت اجربها يلا خلينا نشوف 

فسجلت عندهم وكان حظي ان فيه عرض للي بيسجلوا جديد انك تسجل مجانا بدون رسوم للتسجيل اللي كان 10 دولار امريكي

وبدأت اشتري في الشحنات وبدأت الشحنات توصل للعنوان وكل ما شحنة توصل يبعتولي رسالة المهم بعد ما تأكدت ان كل الحاجات اللي انا اشتريتها وصلت رحت عامل اوردر عشان يبعتولي جميع الشحنات في شحنة واحدة وفعلاً تم عمل المطلوب وتم حساب الجمارك على انها شحنة واحدة فقط وأسعارهم كانت جدا مناسبة.

بعدها حبيت اجرب شركة تاني قولت يلا مهي وسعت بقي رحت مشترك في شركة اسمها ComGateway لقيتها قريبة من الشركة اللي فاتت وسمعتها بارضوا كويسة وعملت نفس القصة اللي فاتت وبعت على العنوان بتاعي هناك 9 شحنات وعملت الاوردر وكانت المفاجئة لما الشحنة وصلت 

تم ارسال الشحنة كل شحنة على حدا ولكن في نفس الوقت فالجمارك حاسبتني على انهم 9 شحنات والمصاريف ارتفعت وقولت مالها ماي يو اس زي الفل 

لذا انصح بالتعامل مع شركة myus من خلال تجربتي الشخصية

تقييمك للموضوع